गडचिरोली-नारायणपूर सीमेवरील चकमकीत चार माओवाद्यांचा खात्मा, शस्त्रे जप्त

गडचिरोली : गडचिरोली-नारायणपूर सीमेवरील कोपर्शी जंगल परिसरात 25 ऑगस्ट 2025 रोजी मिळालेल्या गोपनीय माहितीच्या आधारे माओवादी विरोधी मोहीम राबवण्यात आली. गडचिरोली विभागाचे गट्टा दलम, कंपनी क्रमांक 10 व इतर माओवादी दबा धरून बसल्याची माहिती मिळाल्यानंतर अपर पोलीस अधीक्षक (अभियान) श्री. एम. रमेश यांच्या नेतृत्वाखाली C-60 कमांडोच्या 19 पथकांसह CRPF QAT च्या 2 पथकांनी जंगलात शोधमोहीम सुरू केली.

प्रचंड पावसात दोन दिवसांच्या कसोटीपूर्ण प्रवासानंतर 27 ऑगस्ट रोजी सकाळी पोलीस पथके कोपर्शी जंगल परिसरात पोहोचली. शोधमोहीम सुरू असताना माओवाद्यांनी पोलिसांवर अंदाधुंद गोळीबार सुरू केला. पोलिसांनी प्रभावी प्रत्युत्तर देत सुमारे आठ तास चाललेल्या तीव्र चकमकीनंतर माओवाद्यांचा प्रतिकार मोडून काढला.

चकमकीनंतर परिसरात शोध घेतला असता चार जहाल माओवाद्यांचे मृतदेह आढळले, ज्यात एक पुरुष आणि तीन महिला माओवाद्यांचा समावेश आहे. घटनास्थळावरून एक SLR रायफल, दोन INSAS रायफल आणि एक .303 रायफल जप्त करण्यात आली.

सदर परिसरात उर्वरित माओवाद्यांचा शोध घेण्यासाठी माओवाद विरोधी अभियान तीव्र करण्यात आले आहे.